შონიების შეკრება თბილისი 2026

 

ძვირფასო შონიებო,

უპირველეს ყოვლისა, ყველას გილოცავთ ჩვენი საგვარეულოს კურთხევის მე-12 წლისთავს! 9 ნოემბერი განსაკუთრებული დღეა თითოეული ჩვენგანისთვის. შევიკრიბეთ წმ. გიორგისა და წმ. სერაფიმ საროველის სახელობის ტაძარში, მადლიერების გრძნობის გამოსახატად. რათა უფალს მადლობა შევწიროთ, პატივი მივაგოთ ჩვენს წინაპრებს და კიდევ ერთხელ დავადასტუროთ ჩვენი ერთიანობა.

ჩვენი გვარის ისტორია საუკუნეებს ითვლის. ჩვენი წინაპრები ღირსეულად ცხოვრობდნენ, მოღვაწეობდნენ, სამშობლოს ერთგულად და სახელოვნად ემსახურებოდნენ და მომავალ თაობებს ნათელი კვალი დაუტოვეს. მათი სახელები ჩვენი სიამაყეა, მათი ღვაწლი ჩვენი მემკვიდრეობა, ხოლო მათი ხსოვნა ჩვენი პასუხისმგებლობა. ისინი დღესაც ცოცხლობენ თითოეულ ჩვენგანში, ჩვენს ხასიათში, ღირებულებებსა და იმ საქმეებში, რომლებსაც ვაგრძელებთ. ღმერთმა ნათელში ამყოფოს მათი სულები, ხოლო მათ სახელებს მარადიული ხსოვნა და უკვდავება!

მინდა გავიხსენოთ ჩვენი საგვარეულო მოძრაობის სათავეები, რომელიც ჯერ კიდევ 90-იან წლებში, აფხაზეთში, გალში გამართული პირველი საგვარეულო ყრილობიდან იწყება. აფხაზეთის ტრაგედიამ მძიმე კვალი დატოვა ჩვენზე, დაგვშორა და კავშირები დაასუსტა. თუმცა, გვარის წარმომადგენლებმა არ დაუშვეს ამ კავშირის გაქრობა. თბილისში დევნილობაში მყოფმა გვარიშვილებმა ითავეს საგვარეულო კავშირის აღდგენა — პროფესორ ოთარ შონიასა და დეკანოზ ზაქარიას თაოსნობით, მრავალი ადამიანის ერთობლივი ძალისხმევით. დღეს ყველას თვალწინ გვაქვს შედეგი: საგვარეულო ხატი, რომელიც დაბრძანებულია ქვემო ფონიჭალაში, წმ. გიორგისა და წმ. სერაფიმ საროველის სახელობის ტაძარში, სადაც ყოველი თვის ბოლო კვირას მამა ზაქარია იხდის საგვარეულო პარაკლისს, ლოცულობს ჩვენთვის და მოიხსენიებს გარდაცვლილებს, გვაქვს ჩვენი დროშა, გერბი.

არ უნდა ვიყოთ მხოლოდ იმით კმაყოფილნი, რაც უკვე გაკეთებულია. ერთიანობა ურთიერთპატივისცემა, თანადგომა და საერთო ზრუნვაა. ჩვენი ვალია, ახალგაზრდები უფრო აქტიურად ჩვართოთ საგვარეულო ცხოვრებაში, გავაცნოთ წინაპართა ისტორია და ვასწავლოთ, რომ გვარის ღირსება აწმყოში დასამტკიცებელი პასუხისმგებლობაა.

ქალბატონი ნანული შონია იხსენებს: "მამაჩემი ხშირად მეუბნებოდა ხოლმე: შვილო, გზაზე უბრალო ქვა რომ ნახო, რომელსაც შონია აწერია, ისე არ ჩაუარო, რომ არ მოეფეროო! აი, იმდენად უყვარდა მამაჩემს თავისი გვარი და თავისი გვარისშვილები! ამ სიტყვებში რამდენი სიყვარული, სიამაყე და ერთგულებაა ჩადებული."

ნუ დავკარგავთ ერთმანეთს! გავუფრთხილდეთ ჩვენს ფესვებს, ვიზრუნოთ ერთმანეთზე და მომავალ თაობებს კიდევ უფრო გამტკიცებული ერთობა გადავცეთ.

კიდევ ერთხელ გილოცავთ ამ დღეს! უფალმა დალოცოს ჩვენი საგვარეულო, ჩვენი ფანიები, შვილები და მომავალი თაობები. გვქონდეს მშვიდობა, ჯანმრთელობა და სიყვარული.

ღმერთმა გააძლიეროს და გაამრავლოს შონიების საგვარეულო ! 

ჩვენს წინაპრებს — მარადიული ხსოვნა და უკვდავება !

ჩვენს აწმყოს — ერთობა და სიყვარული !

ჩვენს მომავალს — ღირსება და ნათელი გზა ! 

ძლიერი გვარი - ძლიერი სამშობლო !

შონიების საგვარეულო კავშირი

ფოთი- შონიობა 2026

 

9 ნოემბერი, განსაკუთრებული და სიყვარულით სავსე დღე იყო შონიების საგვარეულოსთვის.

​ჩვენი გვარის კურთხევიდან 12 წლის იუბილეს აღსანიშნავად, ფოთში მცხოვრები გვარის წარმომადგენლები წმინდა ანდრია პირველწოდებულის სახელობის ტაძარში შევიკრიბეთ. დეკანოზმა თევდორემ აღავლინა  პარაკლისი ჩვენი გვარის სულიერად გასაძლიერებლად, ერთობისთვის და ჩვენი წინაპრებისა თუ გარდაცვლილთა სულების მოსახსენიებლად.

​ღვთისმსახურების შემდეგ, საზეიმო დღე გაგრძელდა რესტორან „ბელკანტოში“, სადაც ულამაზესი და სითბოთი სავსე ტრაპეზი გაიშალა. გულწრფელ და უღრმეს მადლობას ვუხდით ბატონ დათო  ჭიჭიკოს ძე შონიას, რომელმაც გამოჩენილი მასპინძლობითა და უშურველი გულუხვობით სრულად ითავა ამ ულამაზესი საღამოს მასპინძლობა და ხარჯები.

​უფალმა დალოცოს, გაამრავლოს და გააძლიეროს შონიების გვარი!

​ძლიერი გვარი — ძლიერი სამშობლო!

გია შონია https://www.facebook.com/share/p/1GgnsNVTGk/

შონიების გვარის კურთხევის 12 წლისთავი — ერთობისა და სულიერების დღესასწაული ხობში

 

დღეს, 9 ნოემბერს, ჩვენი დიდი ოჯახისთვის განსაკუთრებული და საამაყო დღეა — შონიების გვარის კურთხევის 12 წლისთავს აღვნიშნავთ.

უკვე მშვენიერ ტრადიციად იქცა, რომ ამ მნიშვნელოვან თარიღს ჩვენი წინაპრების სულიერ კერაში, ხობის (ნოჯიხევის) ღვთისმშობლის მიძინების სახელობის ტაძარში ვხვდებით. ტაძარში ილორის წმინდა გიორგის ხატით ხელში ავედით; დეკანოზმა მამა ილია ლომაიამ ჯერ საზეიმო პარაკლისი გადაიხადა და სიყვარულით დალოცა ჩვენი ცოცხალი გვარისშვილები, შემდეგ კი გარდაცვლილთა სულის მოსახსენიებელი პანაშვიდი გადაიხადა — რითაც კიდევ ერთხელ გავამყარეთ ჩვენი რწმენა, ერთობა და წარსულთან კავშირი.

განსაკუთრებით ემოციური იყო ირაკლი რევაზის ძე შონიას მიერ მომზადებული 12-წუთიანი ფილმის ჩვენება რესტორან „კოლხეთში“. ეს კადრები თითოეული ჩვენგანისთვის წარსულის გახსენებაცაა და იმ სიყვარულის დაფასებაცაა, რასაც წლების განმავლობაში ერთად ვინარჩუნებთ.

სუფრასთან საგვარეულო თასით შესმულმა სადღეგრძელომ კიდევ ერთხელ გააერთიანა ჩვენი გულები. ჰერალდიკით დამშვენებულ ბანერსა და სამახსოვრო წიგნში ჩაწერილმა სურვილებმა კი სამუდამოდ შეინახა ამ დღის სითბო.

ეს დღე ყველას გვახსენებს, რომ ვართ ერთიანი დიდი ოჯახი, რომელსაც ღრმა ფესვები, ძლიერი ისტორია და ერთმანეთის სიყვარული აერთიანებს.

გილოცავთ, ძვირფასო გვარისშვილებო, მრავალჟამიერ ვიყოთ ერთად!

12 წელი — 12 წუთში...

წლების მატიანე, ერთობის ისტორია და თითოეული ჩვენგანის გზა ერთ ფილმში.

„შონიების საგვარეულო კავშირის ერთობა — 2026“

ავტორი: ირაკლი შონია

შონიების შეკრება აბაშაში 15 ოქტომბერი 2026 წელი

 

დღეს, წმინდა მოწამეების — დავით და კონსტანტინე მხეიძეების ხსოვნის დღეს, დიდი სულიერი სიხარულით დავესწარით აბაშაში, სოფელ მაცხოვრის კარში აღვლენილ წირვა-პარაკლისს, რომელიც ჭყონდიდის ეპარქიის სამღვდელოებამ აღასრულა.

მადლიერები ვართ შონიათა საგვარეულო კავშირის წინამძღოლის, ბატონ ოთარ შონიას თაოსნობისა და ორგანიზებისთვის, რამაც საშუალება მოგვცა ხობიდან ჩავსულიყავით, შევკრებილიყავით და ერთად გველოცა ამ ულამაზეს სოფელსა და ტაძარში.

ამ განსაკუთრებულ დღეს შონიათა საგვარეულომ ტაძარს საჩუქრად შესწირა წმინდა ნიკოლოზის ხატი, რომელშიც ჩაბრძანებულია წმინდანის წმინდა ნაწილები. ასევე მოვილოცეთ მაცხოვრის სახელობის ტაძარი, სადაც ღვთისმშობლის ხატს მირონი სდის. ტაძრის წინამძღვარმა, მამა მიქაელმა დაგვლოცა და ზეთი გვცხო.

განსაკუთრებული მადლობა გვინდა გადავუხადოთ ტაძრის ქტიტორს, ბატონ როლანდ შონიას, ასეთი სულიერი კერის შექმნისთვის.

ასევე, მთელი გულით ვულოცავთ დავით როლანდის ძე შონიას ანგელოზის დღეს! წმინდა მოწამეთა მფარველობა, ჯანმრთელობა და მშვიდობა ნუ მოაკლოს უფალმა მას და სრულიად შონიათა საგვარეულოს.

შონიების საგვარეულო კავშირი ხობის სადროშო

#აბაშა #შონიები

არის ადამიანები, რომელთა ღირსებას მხოლოდ სიტყვებით ვერ აღწერ — მათზე თავად ცხოვრება მეტყველებს, მათი საქმეები კი თაობებს რჩება. სწორედ ასეთ გამორჩეულ ადამიანთა შორის დგას ჩვენი სახელოვანი და ღირსეული გვარიშვილი — ბატონი როლანდ დემურის ძე შონია. ღირსეულ და დაფასებულ ოჯახში აღზრდილი, იგი არის კარგი შვილი, მოსიყვარულე მეუღლე, სანიმუშო მამა, ერთგული ძმა, ნათესავი და მეგობარი — ადამიანი, რომლისთვისაც ოჯახი, გვარი, მეგობრობა და ადამიანური ურთიერთობა უდიდესი ფასეულობაა. იგი არა მხოლოდ სიტყვით, არამედ მთელი თავისი ცხოვრებით ამტკიცებს, რას ნიშნავს იყო ღირსეული გვარის შვილი და შენი სახელით პატივს სცემდე იმ ოჯახსა და წინაპრებს, რომელთა სახელიც გიტარებია. ბატონი როლანდი პროფესიული საქმისადმი ერთგულებითაც გამოირჩევა. ექიმი და ადვოკატი, იგი ორივე სფეროში ღირსეულად ემსახურება ადამიანებს — ცოდნით, პასუხისმგებლობით, გულისხმიერებითა და პროფესიული პატიოსნებით. სადაც მისი დახმარება და თანადგომაა საჭირო, იქ არის; სადაც მეგობარს, ნათესავსა თუ თანამოძმეს იმედი სჭირდება, მისი კარი და გული ღიაა. საიმედო, ერთგული და უღალატო ადამიანია — ისეთი, რომლის გვერდით ყოფნაც სიმშვიდისა და ნდობის განცდას გიტოვებს. მისი ცხოვრების უმთავრეს საყრდენთაგანია რწმენა და უფლის სიყვარული. ეს სიყვარული მის სიტყვებში კი არა, მის საქმეებშია ხილული. საკუთარ ეზოში  წმინდათა დიდთა მოწამეთა აგვეთის მთავართა  დავითი და კონსტანტინე მხეიძეთა სახელობის ეკლესიის აშენებით მან შექმნა ადგილი, სადაც ლოცვა, სიყვარული, მადლი და ადამიანთა ერთობა ერთმანეთთან არის გადაჯაჭვული. ყოველი წლის 15 ოქტომბერს, ამ წმინდა დღეს, ტაძარში იკვლება შესაწირი და მისი სახლის კარი ყველასთვის ფართოდ იღება. სტუმართა რაოდენობას ბატონი როლანდი არასოდეს ითვლის — მისთვის სტუმარი ღვთის საჩუქარია. რამდენიც უნდა მოვიდეს, მთელი ოჯახი მზად არის ყველას სიყვარულით, პატივისცემითა და გულუხვობით უმასპინძლოს. ეს არის მისი ბუნება — გასცეს, გაუზიაროს, გაახაროს და ადამიანებს ერთმანეთის სიყვარული შეახსენოს. მას განსაკუთრებულად უყვარს ოჯახი, სანათესაო, სამეგობრო და ჩვენი საგვარეულო. უყვარს ის დიდი კავშირი, რომელიც ერთი გვარის ადამიანებს აერთიანებს და თაობიდან თაობას გადაეცემა. ამიტომაც მისი სახელი ჩვენი საგვარეულოსთვის მხოლოდ ერთი ადამიანის სახელი არ არის — იგი იმ ღირსებების, ტრადიციებისა და ადამიანური ფასეულობების ნაწილია, რომლითაც გვარი ამაყობს. და, რა თქმა უნდა, სადღესასწაულო სუფრა მის გარეშე სრულყოფილი ვერ იქნება — კარგი თამადა, იუმორის მოყვარული, ხალისიანი, თბილი და სიყვარულით სავსე ადამიანი, რომელსაც შეუძლია სუფრას არა მხოლოდ სიტყვა, არამედ გულიც შესძინოს. ბატონო როლანდ, დღეს ჩვენი საგვარეულოს სახელით მინდა გითხრათ ყველაზე მთავარი: მადლობა თქვენ! მადლობა იმ სიკეთისთვის, სითბოსთვის, ერთგულებისა და სიყვარულისთვის, რომელსაც ასე უხვად გასცემთ. მადლობა თქვენს მშობლებსაც, რომლებმაც ასეთი ღირსეული ადამიანი აღზარდეს და ჩვენს ოჯახებსა და საზოგადოებას შემატეს. უფალმა დალოცოს თქვენი ოჯახი, თქვენი შთამომავლობა და თქვენი კეთილი საქმეები. ღმერთმა გვიმრავლოს ჩვენს საგვარეულოსა და ჩვენს ქვეყანას თქვენნაირი ღირსეული, მორწმუნე, პატიოსანი და კაცთმოყვარე ადამიანები. გიმრავლოთ უფალმა ბედნიერება, სიხარული, ჯანმრთელობა და ოჯახური სიმტკიცე; დაგილოცოთ ყოველი დღე და თქვენი სახელის გაგრძელებად მრავალი კეთილი თაობა გყოლოდეთ. გვიყვარხართ, გვეიმედებით და გვეამაყებით! მრავალჟამიერ თქვენი სიცოცხლე, ბატონო როლანდ! უფლის მადლი და წყალობა არ მოგკლებოდეთ თქვენ და თქვენს მთელ მოდგმას. თქვენი კერა მუდამ სითბოსა და სიყვარულს აფრქვევდეს, თქვენი სახელი კი სიკეთესა და ღირსებასთან ერთად თაობიდან თაობას გადაეცემოდეს. ღმერთმა დაგლოცოთ და გაგაძლიეროთ! 

შონიების საგვარეულო კავშირი.

გულითადად ვულოცავთ როლანდსა და მის ოჯახს მოწამეთობას-წმინდათა დიდთა მოწამეთა არგვეთის მთავართა დავით და კონსტანტინე მხეიძეთა ხსენების დღეს! ხოლო ბატონი როლანდის ვაჟიშვილს ძვირფას დავითს — ანგელოზის დღეს! დავით, გულით გისურვებთ ჯანმრთელობას, დღეგრძელობას, სულიერ სიმშვიდესა და ბედნიერებით სავსე ცხოვრებას. შენი მფარველი წმინდანის მადლი და წყალობა მუდამ გფარავდეს, შენს ოჯახში კი არასოდეს დაილიოს სიყვარული, სიხარული და ღვთის მადლი! ამ განსაკუთრებულ და მადლიან დღეს, ჩვენი საგვარეულოს სახელით, დიდი სიყვარულითა და პატივისცემით, გვინდა მოგართვათ წმინდა მღვდელმთავარ ნიკოლოზის ხატი. დაე, მისი მადლი და მფარველობა მარად თან გდევდეთ, გიცავდეთ ყოველგვარი განსაცდელისგან და თქვენს ოჯახს მშვიდობას, ჯანმრთელობასა და ღვთის წყალობას ჰფენდეს. წმინდა ნიკოლოზის ლოცვა-კურთხევა არასოდეს მოგკლებოდეთ! ღმერთმა დალოცოს თქვენი ოჯახი და თქვენი კეთილი საქმეები! მრავალჟამიერ თქვენს სიყვარულს, რწმენასა და ერთობას!

შონიების საგვარეულო კავშირი

წმინდა ნიკოლოზის აღდგენილი ტაძარი ზუგდიდში და ნონა შონიას საიუბილეო პარაკლისი

 

ზუგდიდში, იქ, სადაც ათწლეულების წინ წმინდა ნიკოლოზის სახელობის ტაძარი მდებარეობდა, სულიერი ცხოვრება ხელახლა იბადება. კომუნისტური რეჟიმის დროს დანგრეული და მივიწყებას მიცემული წმინდა ადგილი კვლავ იბრუნებს თავის პირვანდელ დანიშნულებასა და სიდიადეს.

 ქალბატონ ნონა შონიასა და მისი ოჯახის გულმოდგინე ზრუნვითა და თაოსნობით, ამ ისტორიულ მიწაზე წმინდა ნიკოლოზის ახალი ტაძარი შენდება. ეს წამოწყება მხოლოდ ტაძრის მშენებლობა არ არის - ესაა ისტორიული სამართლიანობის აღდგენა, რწმენის გამარჯვება დროზე და წინაპართა ლოცვის გაცოცხლება.

 დღეს ამ წმინდა ადგილას განსაკუთრებული და ისტორიული დღე შედგა: ტაძრის უკვე ნაკურთხ საძირკველთან, ხანგრძლივი პაუზის შემდეგ, პირველად აღესრულა წმინდა ნიკოლოზის პარაკლისი.

ეს სულიერი ზეიმი კიდევ უფრო ამაღელვებელი და მნიშვნელოვანი გახდა იმით, რომ დღეს ქალბატონ ნონა შონიას 70 წლის იუბილეა ! ეს არის უფლისადმი გაღებული ულამაზესი მადლიერების საჩუქარი და გამორჩეული გზის დაგვირგვინება.

 ვულოცავთ ქალბატონ ნონას ღირსშესანიშნავ იუბილეს, ვუსურვებთ ჯანმრთელობას, სულიერ მხნეობასა და იმ დიდ სიხარულს, რომელსაც საკუთარი თვალით დასრულებული ტაძრის ხილვა და მასში აღვლენილი წირვა-ლოცვა ჰქვია.

 ტაძარს შონიების საგვარეულო კავშირის სახელით, გადაეცა ხატი წმიდისა ნიკოლოზისა. 

"ხატი წმინდისა ნიკოლოზისა დაიწერა შონიების საგვარეულოს შემოწირულობით 

დეკანოზ ზაქარია შონიას ლოცვა-კურთხევითა და ოთარ შონიას ხელმძღვანელობით"

შონიების საგვარეულო კავშირის წინამძღოლი 

ოთარ შონია

https://www.facebook.com/share/p/17fQT5B8f3/